Namma kataysah kissaata

Namma kataysah kissatà

Yoon kee Kadir diqsitan. Yoon kah yaabukem chayna, Kadir kah yaabukem Itoppiya. Elle yongooroweenim Itoppiyah addal takkeh tan giti bicisih cugaysoy (project)  Chaynah doolat qokla kinni. Yoon kee Kadir edde taamitak sugen cogayso orobte waqdi wacaysirih chaynah inayta Beyjing safren.  Kadir kataysâ buxa le qaxah sangeeleh yikataysaw a buxa maaluk maca kok geyte iyyeh essere!

Yoon musuyya iyyeh gaba kaak abbaxuk qarik afa beya gital gaba kaah ruubak tamaa table gitak 10% yok beyte kaak iyye!

Kadir yaabat kaak rade weemih dareeme waqdi a gita bicsoonuh doolat kah yibbixe maaluk 10% inni buxa xise kaak iyye!

Kadir yoonuk yoobbe Fayuk ugutak issi baaxo yendebbe saaku doolat giti bicah yibbixe maaluk 100% inkih issi maslacatal asise.Yoon 3 sanatak lakal Kadirit yongoorowe saaku Kadir xise buxa qajjabsitak maaluk elle yeyyeeqem kaal essere!

Kadir Essero kaah gacsuh 1cisba makiinat kaa Betta heeh elle yemeeten badumul feera kaah ruube. Yoon Kadir iyyaamat rade cineh essero kaat qagseh😁

Kadir yi kataysaw ta maa table gitak 100% inni buxah xisnel asise kaak iyye!

Yoon garboksa gaba xayil giti kaah amballe cineh yoo tablaasem cooxu bas iyye!

Kadir coox takku tablem gita takku tamakkel gitah yibbixen maalu inkih inni maslacatal asise kaak iyye!

Abak raagak teenak

Kasal raaqan!!!

Axcem teeti......

Alle waynam
Alle waynam abto'kkal yab hinna
Alle waynam date'kkal carsa hinna
Alle waynam cuumi'kkal cami hinna
Alle waynam goori'kkal gorci hinna
Alle waynam fiqma'kkal meela hinna

Alle waynam reebu'kkal raabit hinna

Alle waynam xisne'kkal baaxo hinna
Alle waynam nooko'kkal guuro hinna
Alle waynam boyla'kkal boola hinna

Iyyeenik kalah abnam lino....

Qafar qumxaaneyti social medial abak geytima angoyyak xalot foyya matakkam asmata. Naharsi tuxxiq kak sittin fantaaxaw kee inkittinaane gablussaanam kinni. Qusba widdirih addat tonnah kaadu mango qunxaaneyti facebook booxa takku wohuk kalah tan angaaraw mansafittel siitak geyan ixxiga abinal milaagaanam tamballe. Ammuntal kah escessennah qafar qunxaaneyti sissin angaaraw mansafitteh addal abak geytima angoyyak xalot xeeri way qafar ayyuntih mano milaagimtuh qokol takkeh tan ixxigaa kee kas cabe loonumul kibal liyo. Wohuk ugutak umman abnah nan angaarawal qafar ayyunta tanfiqeh tan ixxigaa kee fayu siitat tabisnaamak wadir axce waynay
👍Kas yengelek agat saadisa!
👎Haas yengelek deedal gaadisa!

Aysuk aysenno

Qafar ummatih migaq baadal away elle yamixxigeh yan gadaama kee xixxibaanek katuh amoder qafar ayyunti inkih gabah assagolla edde haysitah yan giclo nek faxximta. Aakamal ayyunti gabah assagolla aytikumussa ikraaro kee gexsit yabqureenim xintô xagarak qambalsimta dirki kinni. Takkay waytay xintô xagar elle xiinek naharsi maaqatta foocâ fan intam faxximtam Mihrat leela kinnim asmat le numma. Amoxer ayyunti edde geytimah yan wadir-raq kee gadaamak yawquh afkan kee qokol geek sissikuk milaagu baahe kal raaqe waam baadal tate 60 sanatih addat tamballe numma kinni. Baxsaluk ni'yyuntay qaadah abbootanih(reedah) afiito barteh iyya uguugus kee abini inkih akak missoowa saqal takku butta geek woo raat sissikuk kateeloonumul diggale kibal liyo. Wohuk ugutak Qafarak xintô xagoritte kee tutaaxago malloowak qafar ayyuntih mano sissikuk kah milaagimtannah yattakayyoonay

#Mohammed Ali Kuhul

Qafar ummatih migaq waaray.

Kuhultaafar.blogger